Bang Media

Uburyo 5 bwo Kwerekana Urukundo

1. Amagambo meza

Amagambo meza kandi aha agaciro umukunzi wawe ni kimwe mu bintu ushobora gukora kugira ngo umugaragarize urukundo.

Ururimi burya ni ikintu gikomeye cyane, rufite ubushobozi bwo kurema ariko kandi rukanagira ubwo gusenya, niyo mpamvu mu byo uvuga niba uri kumwe n’umukunzi wawe ugomba kujya witonda. Amwe mu magambo meza twavuga ni nk’amagambo atuma umuntu amererwa neza, akaba ari amuha compliments kandi amutaka. Ari amagambo amubwira ko ari uw’agaciro, ariwe wifuza mu buzima bwawe bwose, ko nta wundi umukurutira, n’andi menshi atuma yishima.

2. Ibihe byo kuba muri kumwe, mugahana umwanya uhagije


Mujye mufata umwanya wo kurebana, kuganira, guseka... ubu ni uburyo umwe mu bakundana ashobora kuba yifuza kandi kuri we akabufata nk’aho ari bwo umugaragariza urukundo. Kuba wamuha umwanya wawe, ukamureka akakureba, akakuganiriza,.. yisanzuye, yumva ntaho ugiye kujya ngo umucike bimugaragarize ko umwitayeho kandi ko umukunda cyane. Ku bakoresha uru rurimi baba ahubwo banifuza ko ari bo ari n’abakunzi babo yewe banafunga na telefoni ku buryo nta muntu ubasagarira, bagakoresha umwanya wabo ari bombi gusa.

3. Impano

Si ngombwa ko ugira byinshi usobanurira umukunzi wawe mu gihe umuhaye impano runaka, kuko impano ubwayo iba ifite ubushobozi bwo gusobanurira umukunzi wawe icyo utekereza.

Ibyiza by’impano kandi ni uko igisobanuro cyayo kigumaho igihe cyose abona iyo mpano wamuhaye, bityo ugasanga biba byiza kurushaho gutanga impano idapfa cyangwa ngo yibagirane.

Impano kandi ntizigomba kuba zihenze cyane, kuko igishimisha umukunzi ahanini ari uburyo uyimuhaye n’igisobanuro cyayo kurusha yo ubwayo. Gusa burya ni byiza ko utanga impano utarindiriye ko haba ikintu kidasanzwe kugira ngo uyimuhe.

4. Kumuha ubufasha no kumwereka ko witeguye kumufasha igihe cyose

Ingero z’ibyo wafasha umukunzi wawe ni nyinshi. Ushobora kumuzingira imyenda wamusuye cyangwa ukanajya iwe mutabivuganye, ukamutunganyiriza icyumba cyangwa ukamutegurira ifunguro ryiza mu gihe atabyiteguye. Ibi birashoboka ku bamaze kubana ndetse yemwe no ku batararushinga bakundana. Ibi ni ibintu ushobora gukorera umukunzi yaba yabigusabye cyangwa atabigusabye.

Ushobora kandi kumva nk’ikintu avuga ko akeneye, wenda adahita apfa kubona ako kanya kubera ko gihenze cyangwa kidapfa kuboneka, ugahita ucyimushakira. Ibi bikorwa byose bituma umukunzi wawe yumva akwisanzuyeho kurushaho kandi bikamushimisha rwose.

5. Kumugaragariza urukundo umukoraho

Ku bantu bashobora kuba batumva neza ikiza cy’ubu buryo mushobora kurebera ku rugero rw’umwana w’uruhinja.

Ese ntimujya mubona umwana muto arira, hanyuma mama we cyangwa se n’undi muntu wese yamufata mu ntoki ze agahita ako kanya aceceka? Ese aho nturabona ibyishimo umwana muto agira iyo mama we amuhaye akabizu (bisou) ku itama cyangwa mu gahanga?

Natwe rero abantu bakuru bitubaho, iyo umuntu agukozeho cyangwa akaguha bizu ari inshuti yawe ni bumwe mu buryo bwiza bwo kukwereka icyo atekereza kandi nawe ubwawe bukagushimisha.

Si ibi kandi gusa, ikindi gishobora kuboneka hagati y’abakunzi muri ubu buryo ni ugukorana imibonano mpuzabitsina n’uwo mukundana.

Mbere ya byose ariko, jya ubanza wimenye ubwawe, nka bya bindi ngo mbere yo gukura agatotsi mu jisho rya mugenzi wawe, ni byiza ko ubanza ugakura umugogo uri mu jisho ryawe. Burya kumenya uburyo bushimisha umukunzi wawe ni byiza, ariko kandi burushaho kuba byiza iyo ubanje ukimenya nawe ubwawe, ukamenya ikigushimisha, ukamenya uburyo wishimira kurusha ubundi muri ubu bwose tumaze kubona haruguru ariko kandi ukiga no kumenya ururimi umukunzi wawe avuga mu rukundo.

Birashoboka ko mu rukundo waba uvuga indimi zirenze ebyiri cyangwa eshatu, ariko burya haba harimo rumwe rurusha izindi imbaraga bityo rukaba arirwo ukoresha mu rukundo cyane.

Ushobora kuba ukunda impano, ukaba ukunda ko bagusohokana ariko wenda ahanini ukaba ukunda kurushaho gutegwa amatwi n’umukunzi wawe, mukaganira, mukamarana umwanya munini kurusha ibindi byose.

No comments:

Post a Comment